Óvænt ferðalag

Eftir vikudvöl upp í bústað foreldra minna í Grafningnum, fyrst með vinum okkar og svo mömmu og pabba og 2/3 af systkinum var ég ekki á því að nenna heim til mín enda komin í ógurlegan ferðagír. Jói var heima að vinna og þegar ég heyrði í honum á fimmtudeginum og hann tilkynnti mér að hann væri á leiðinni inn í Skaftafell að vinna fékk ég þá hugdettu að fara snemma heim á föstudeginum, ná í tjaldvagninn þeirra mömmu og pabba, meiri föt og mat og bruna ein með krakkana í Skaftafell og hitta Jóa þar bara og taka útilegu á þetta.

Á föstudeginum var ég komin heim rétt fyrir hádegi, tók okkur til, útréttaði aðeins og náði svo í tjaldvagninn heim til mömmu og pabba. Ég sem hef aldrei keyrt með tjaldvagnn, hvað þá fest hann á bíl fór að hugsa, þegar ég dröslaði tjaldvagninum út úr garðinum, hvort ég væri kannski að fara aðeins fram úr sjálfum mér. Með pabba í símanum fékk ég nákvæmar leiðbeiningar um hvernig ég ætti að festa kvikindið aftan í jeppann og þegar það var búið var bara að hefja förina. Það gekk mjög vel að keyra og stoppuðum við tvisvar á leiðinni, fyrst á Hvolsvelli í matarpásu og svo á Kirkjubæjarklaustri í rólópásu. Ég er svo heppin með þessi börn að þau haga sér einstaklega vel í bíl, annað hvort sofa þau bara eða sitja bara stillt og dúlla sér með dót eða fíflast í hvort öðru. Við vorum svo komin í Skaftafell rétt fyrir átta á föstudagskvöldinu og hittum Jóa strax á bílastæðinu þar sem hann og Palli frændi hans voru að gera við stóra gula skólarútu. Að sjálfsögðu var þá bara tekinn rúnturinn um bílastæðið á henni áður en fundið var tjaldstæði þar sem við vorum fram á sunnudag. Vorum í allskonar veðri en besta veðrið var þó á sunnudaginn þegar það voru í kringum 17°C, sól og blíða. Löbbuðum við upp að Skaftafellsjökli, að Svartafossi, kíktum á Jökulsárlón, fórum í sund á Kirkjubæjarklaustri, kíktum á Dyrhólaey og höfðum það almennt huggulegt.

Hér koma nokkrar myndir frá ferðalaginu okkar :)

-R-

LKL

Lengi vel hef ég verið of þung og hef ég prófað ýmislegt í gegnum tíðina til að minnka bumbuna. Ég er soldið þannig að ég verð að sjá árangur sem fyrst til að nenna að halda því áfram sem ég er að gera. Ég hef lagt mikið upp úr hollum mat hérna heima við, ávöxtum, grænmeti, mjólkurvörum án viðbæts sykurs og svo framvegis, leyft mér smá óhollustu um helgar og þessháttar en þrátt fyrir það hefur lítið sem ekkert gerst á vigtinni, ekki það að kíló skipti öllu.

Allavega ákvað ég að prófa það nýjasta nýtt sem virðist vera að tröllríða landanum þessa dagana sem er LKL eða lágkolvetna lífsstíll. Eftir tvær, þrjár vikur af því að lesa mér til um þennan lífsstíl og kynna mér hann vel og að Jói kom heim með bókina hans Gunnars Más ákvað ég að skella mér í fjörið og oh boj oh boj. Eftir eina viku fóru hátt í 2 kg, ég er aldrei svöng, borða bragðgóðan og skemmtilegan mat og leik mér af því að búa til allskonar gúmmelaði í eldhúsinu. Bókin er æði, með fullt af skemmtilegum uppskriftum og full af fróðleik. Ég skoða líka töluvert bloggið hennar Maríu Kristu og fæ inspiration af bragðgóðum og skemmtilegum mat :)

Eins og staðan er núna finnst mér þetta æði og ætla að halda ótrauð áfram :) Mæli með þessu fyrir þá sem vilja prófa :)

Home improvement!

Ég hef alltaf verið algjör sökker fyrir því að breyta inni hjá mér og gerði það mikið sem krakki að taka herbergið mitt og breyta því fram og tilbaka. Þetta var gert á svona nokkra mánaða fresti mömmu stundum til mikillar gleði eða þannig. Íbúðin sem ég bý í núna býður ekki upp á neina möguleika á að endurraða húsgögnum eða einhverju þvíumlíku sem myndi gleðja hjartað mitt mikið. Við höfum reyndar í gegnum tíðina skipt út nokkrum húsgögnum sem hefur gert heilmikið fyrir rýmið og ég er alveg sátt með þetta eins og er en mig langar samt alltaf að breyta til af og til.

En þegar staðan er svona þá er bara eitt að gera og það er að ráðast á herbergið hennar Brynju og græja og gera. Ég hef svolítið verið að færa rúmið hennar fram og tilbaka og skipulagt restina eftir því en hún var með lága upphækkun á rúmið sitt sem er frá Flexa sem gerði það að verkum að undir því skapaðist smá leikpláss sem er fínt þar sem herbergið hennar er svo lítið. Flexa rúmin eru rosalega sniðug og hægt að kaupa allskonar aukahluti sem hægt er að poppa rúmin skemmtilega upp. Sjá hér.

Að undanförnu hefur mér reyndar fundist þetta fína leikpláss vera meira bara draslarageymsla og hefur þessi upphækkun það í för með sér að það er einungis hægt að hafa rúmið á einum stað í herberginu. Þegar barnið tók svo upp á því að handleggsbrotna um daginn þá ákvað ég að nú væri sniðugt að nýta tækifærið og lækka rúmið niður og auðvelda henni það að koma sér upp í rúm á kvöldin. Ekki skemmdi það svo fyrir að ég fékk að breyta og græja og gera. Við mæðgur ákváðum að skipta út gardínum í leiðinni sem voru með mynd af Bangsímon á sem verður að segjast að er orðið aðeins of barnalegt fyrir skvísu sem er að verða 7 ára á árinu. Við fórum því í Ikea og skoðuðum efni og keyptum skemmtilegt efni sem ég saumaði gardínur úr. Efnið kostaði samtals 2600 kall. Við ákváðum svo að kaupa einhverja sæta púða til að hafa í rúminu hennar og keyptum fjögur stykki í Rúmfatalagernum og púðaver með. Samtals á 2700 kr. Við ákváðum svo að skipta út bastkörfunum sem dótið hennar var í og keyptum fjóra Dröna kassa í Ikea. Samtals á 3980 kr. Þá var bara eftir að kaupa fallegt rúmteppi en við fundum ekkert sem okkur fannst henta. Þá kom mamma okkur til bjargar með gamalt rúmteppi sem hún ætlaði að setja í nytjagám. Ég tók það og minnkað og fékk Brynja annan helminginn til að nota sem rúmteppi en hundurinn fékk restina til að nota sem bæli inni í búri og er hann núna eins og kóngurinn í ríki sínu á vínrauðu þykku vatteruðu rúmteppi!

Við erum rosa ánægðar með breytinguna og nú er bara spurning hversu lengi við höldum okkur við þetta áður en mamman fer að klægja í fingurna aftur að snúa öllu við ;)
 

Fyrir

Eftir

Eplakaka framhald

Prófaði uppskriftina sem ég nefndi um daginn sem ég fékk frá Hörpu vinkonu. Hún var alveg hrikalega góð og pabbi sem var yfirsmakkari fannst hún betri sem og okkur hinum. Hefði samt þurft að minnka saltmagnið sem gefið er upp í uppskriftinni en það var of mikið. Kakan var mjúk að innan en rosa krönsí ofan á og með svona pínu karamellukeim. Alveg mega góð með þeyttum rjóma.

Hérna kemur uppskriftin:

• 4 epli
• 1 tsk kanil
• 100 gr smjör
• 2,5 dl sykur
• 150 gr hveiti
• 1 tsk lyftiduft
• 2 tsk vanillusykur
• 1,5 tsk salt
• 1 egg, upphrært

Hitið ofninn í 200° og smyrjið bökuform með smjöri. Afhýðið eplin og fjarlægið kjarnana. Skerið eplin í þunnar sneiðar og leggið í bökuformið. Stráið kanil yfir.
Bræðið smjörið og látið það kólna. Blandið þurrefnunum saman í skál. Hrærið eggið upp með gaffli eða vispi. Blandið smjöri og eggi saman við þurrefnin. Breiðið deigin yfir eplin og stráið smá kanil yfir. Bakið í neðri hlutanum á ofninum í 40 mínútur. Berið fram með ís eða rjóma.

Eplakaka

Síðan Jökull fæddist hef ég verið í litlum mömmuhóp með góðri vinkonu og fleirum sem við köllum krúttmúttur. Við höfum verið að hittast einu sinni í viku og skiptumst á að bjóða heim í morgunkaffi og spjall. Þó að Jökull sé byrjaður hjá dagmömmu þá hef ég reynt að ná einstaka hitting og fyrst hann átti tíma í 10 mánaða skoðun í gærmorgun ákvað ég að nýta tækifærið og bjóða þeim svo heim í kjölfarið og leyfa litla dekurdýrinu að fá frí hjá dagmömmunnum og vera heima í kósý og dekri hjá mér :)

Ég hef lengi verið að leita að hinni fullkomnu eplaköku en ekki fundið enn. Góð eplakaka með þeyttum rjóma eða ís er alveg delish! Ákvað að prófa eina uppskrift í gær fyrir stelpurnar sem var góð en ekki nógu góð. Fékk svo senda uppskrift frá einni krúttmúttunni í gær af köku sem ég smakkaði hjá henni og var allt sem góð eplakaka, að mínu mati, á að vera; mjúk, með fullt af eplum, krönsí að ofan og með fullt af kanil. Hlakka til að prófa hana :p Læt vita hvernig heppnast :)

Kjúklingabaka aka pizza ;)

Í matinn í kvöld skellti ég í eitt af mínu uppáhalds. Kjúklingaböku eða pizzu réttara sagt. Fékk æði fyrir þessu eftir að Saffran opnaði og ég smakkaði bökurnar þeirra. Ákvað að gera mína eigin útgáfu sem ég skelli í svona endrum og eins sérstaklega þegar ég á eins og eina kjúklingabringu sem ég þarf að láta duga fyrir okkur öll.

Í grunninn er þetta vel grófur pizzabotn, ofan á set ég pizzasósu sem ég poppa aðeins upp með hvítlauk, ítölsku kryddi og tómatpúrru, mozzarella ostur, kjúklingabringa í smáum bitum og smá hreinn rjómaostur. Þegar þetta er svo komið út úr ofninum dúndra ég á þetta fullt af rucola, ferskum rauðlauk, tómötum og drissla svo homemade hvílauksolíu út á. Algjörlega delissssh..... :)

Tómatlöguð kjúklingasúpa með karrý

Mér finnst hrikalega skemmtilegt að búa til súpur. Skera niður allskonar skemmtilegt úr ísskápnum, skutla í pott og malla í smá tíma, krydda með dassi af hinu og þessu, peppa upp með tómatpúrru, rjómaosti, rjóma eða bara því sem ég á við hendina. Gaman að gera slatta magn og eiga í hádegismat daginn eftir og kannski bara líka daginn þar á eftir. Verst bara að fólkið heima hjá mér er voðalega lítið fyrir súpur þannig ég geri þær ekki eins oft og mig myndi langa til.

Ég fékk rosalega góða súpu um daginn hjá tengdamömmu sem ég er búin að gera nokkrum sinnum, samt aldrei nákvæmlega eftir uppskriftinni. Hún var reyndar í rosalega stórum hlutföllum þannig ég minnkaði hana aðeins. 

Hér kemur uppskriftin eins og ég er að malla til að eiga fyrir kvöldið í kvöld:

2 kjúklingabringur, skornar í bita og steiktar á pönnu

1/2 rauð paprika, smátt skorin

1/2 græn paprika, smátt skorin

2 gulrætur, smátt skornar

lúka af smátt skorinni sætri kartöflu

1  hvítlauksgeiri, saxaður

1/2 laukur , smátt skorinn

1 msk olía

1 dós saxaðir tómatar

1 teningur af kjúklingakrafti

1-1/2 msk karrý

smá kjúklingakrydd

1,5 lítrar vatn

1/2 peli rjómi

1 dós tómatpúrra

100 g rjómaostu

salt og nýmalaður pipar

Elska þessa liti! :)

Aðferð:

Olían hituð í stórum potti og grænmetið steikt í smá stund. Vatninu, tómatpúrrunni, karrýinu, kjúklingateningnum og söxuðum tómötum bætt saman við. Þessu er leyft að malla þangað til grænmetið er orðið mjúkt og fínt eða í ca. 30 mínútur. Kjúklingnum svo bætt í súpuna þegar búið er að steikja hann á pönnu uppúr smá olíu og kryddaður með kjúklingakryddi og salti og pipar. Allt soðið við vægan hita í 10 mínútur. Rjóminn og rjómaosturinn fer svo síðast í og svo kryddað með salt og pipar eftir smekk og jafnvel meira karrý ef fólk er til í svoleiðis. 

Meðlætið á þessum bæ verður svo sýrður rjómi, rifinn ostur, nachos flögur og jafnvel heimabakað brauð ef verð í stuði á eftir og ef erfðaprinsinn leyfir.  

Þessi er bragðgóð og pínu sterk og hægt að leika sér með hana og demba bara því í hana sem maður á þá stundina inn í ísskáp. 

Mæli með henni :)

Kókos- og hafrakonfekt

Fimmtudagar eru vanalegast kósýdagar hjá okkur Brynju. Hún er búin snemma í skólanum og þarf ekki að vinna neina heimavinnu. Við byrjum því yfirleitt á því að klára heimalesturinn og gera eitthvað skemmtilegt t.d. föndra, lita, perla, leika eða jafnvel horfa bara á eina skemmtilega teiknimynd. Um daginn var ég búin að lofa henni að baka eitthvað sniðugt en hún fékk vinkonu sína í heimsókn þannig við frestuðum því. Í dag ákváðum við því að skella í einhvern smá bakstur því veðrið var bara eitthvað þesslegt ;) Hún vildi ólm baka kókoskúlur en ég átti hvorki smjör né flórsykur sem þarf í þesskonar bakstur. Hins vegar átti ég til agavesýróp af einhverri ástæðu og kaldpressaða kókosolíu. Þá datt mér í hug uppskrift frá henni Sollu á Gló sem hún gerði í Með okkar augum á Rúv. Þar gerði hún súpereinfalt kókos- og hafrakonfekt sem Brynja galdraði fram með smá aðstoð frá mömmslunni.

Hérna er uppskriftin:

Kókos og hafrakonfekt 1 dl kaldpressuð kókosolía ½ dl agavesýróp 2 msk hunang 1 tsk vanilla duft eða dropar 1 ½ dl kakóduft 2 dl kókosmjöl 2 dl tröllahafrar nokkur saltkorn Aðferð:

Setjið kókosolíu, agavesýróp og hunang í skál. Bætið vanillu og salt út í og hrærið saman. Bætið kakóduftinu við og látið blandast, bætið síðan kókosmjölinu  og tröllahöfrunum útí og klárið að blanda þetta saman.
Setjið í lítil konfekt eða muffinsform. Sett inn í frysti eða kæli þar til þetta hefur stífnað. Tilbúið og njótið!

Við Brynja áttum ekki muffinsform þannig við skelltum þessu bara í sílikonformið okkar góða og dúndruðum inn í frysti :) Hrikalega gott og sló á alla súkkulaðiþörf :)

Akureyri

Þvílík dýrðarinnar helgi að baki. Við Jói skruppum til Akureyrar yfir helgina í barnlausa afslöppunarferð en það hefur held ég bara aldrei gerst að við höfum farið eitthvað barnlaus yfir nótt og notið þess að vera bara við tvö ein kærustuparið. Gistum á Hótel Kea í tvær nætur og vorum á bílaleigubíl frá Hertz sem Jói vann í happdrætti á jólahlaðborðinu sem hann fór á með vinnunni.

Fyrsta næturpössunin hans Jökuls var ekki ein heldur tvær nætur og mömmuhjartað pínu stressað með það en eftir að hafa heyrt í mömmu á laugardagsmorgninum og heyrt hversu góður hann var yfir nóttina þá varð ég ennþá afslappaðri. Brynja var líka algjört ljós og það auðveldaði okkur foreldrunum lífið að þurfa ekki að hafa áhyggjur af því að börnin væru að gera ömmu sína og afa vitlaus ;)

Helgin var æði í alla staði. Hótelið æði og morgunmaturinn mjög vel útilátinn. Veðrið gott og félagsskapurinn að sjálfsögðu bestur í heimi. Við nutum þess að sofa út, rölta um bæinn, fara í sund, út að borða, lögðum okkur meirað segja um miðjan dag, fengum okkur í glas, fórum í bíó, á barinn, á kaffihús, bíltúr og nutum þess að vera saman og spjalla saman um heima og geima.

Bílaleigubíllinn, ofsa næs!

 Herbergið okkar

 Morgunmatur

 Sæti minn í morgunmatnum

 Í göngutúr um bæinn

 Við Pollinn

 Jóinn alveg með pósurnar á hreinu

Á leiðinni út að borða á laugardagskvöldið

 Úti að borða á Bautanum á laugardagskvöldinu

Þetta er eitthvað sem við ætlum að gera aftur og þurfum að gera reglulega held ég bara til að hlaða batteríin því við komum endurnærð tilbaka. Nú er bara að vera duglegur að skoða spennandi hópkaupstilboð og skella sér á eitthað spennandi þegar þar að kemur.
Það var samt ofsa gott að koma heim og knúsa skrímslin og ákvað Jökull að vera ekkert að tvínóna við hlutina á meðan við skruppum út úr bænum því hann byrjaði að skríða á fullu og gengur núna undir nafninu Skriðjökull :)

Hrökkbrauð og hummus

Það var skipulagsdagur hjá Brynju í gær þannig hún var bara heima í kósý með mér og Jökli. Við ákváðum að skella í hrökkbrauð og svo bjó ég til hummus til að hafa með úr kjúklingabaunum sem ég fann inni í frysti um daginn þegar ég var að taka til þar.

Þessa hrökkbrauðsuppskrift fékk ég hjá Þóru vinkonu, klikkað góð og sjúklega einföld. Skemmir náttúrlega alls ekki fyrir að hún er alveg ger- og sykurlaus :) Brynja sá bara að mestu um þetta og var ég meira svona bara á kantinum og hafði yfirumsjón með því sem fram fór.

Brynja bakari

  

 Ready fyrir ofninn

Hummusinn er líka mjög einfaldur og mjög bragðgóður. Alls ekki olíumikill eins og mér finnst svo oft einkenna hummus og varð áferðin bara einhvernveginn fullkomin.

Hér er uppskrift af hrökkbrauðinu:

5 dl af einhverjum fræjum, ég notaði hörfræ, sólblómafræ og sesamfræ

3,5 dl hveiti/heilhveiti/spelt, ég notaði grófmalað spelt og smá heilhveiti

1 tsk salt

1 dl olía

2 dl vatn

 

Öllu blandað saman og flatt út á 2 plötur. Best er að nota bara fingurna við það því þetta er vel blautt, skera svo í sneiðar og inn í 200 gr. heitan ofn í 12-15 mín.

Og hér er uppskrift af hummusnum:

2 bollar soðnar kjúklingabaunir, allt í lagi að nota baunir úr dós, t.d. frá Sollu

5 msk Tahini

1 tsk gróft sjávarsalt
Kreistur safi úr einni sítrónu, ég notaði limesafa því ég átti ekki sítrónu

3-4 hvítlauksgeirar 

3 msk olía
1/4 bolli vatn, má vera meira eða minna bara eftir því hversu þykkur hummusinn á að vera

 
Öllu skellt í blenderinn og blandað saman þangað til áferðin er mjúk og flott. Hægt er svo að bæta smá vatni saman við ef þetta er of þykkt. 

 Hrökkbrauðið tilbúið og hummusinn líka, algjörlegt delish!

Mega einfalt, hrikalega gott og fínn biti í millimál :)

Brúðkaupspælingar

Eftir að Jói bað mín rétt fyrir jólin 2011 hef ég verið að pæla í hvernig við myndum vilja hafa brúðkaupið okkar. Erum bæði með ákveðnar hugmyndir sem hafa lítið breyst. Spurning er bara dagsetning og gestafjöldi og það að hafa efni á þessu öllu ;) Er eiginlega ákveðin í að baka kökuna sjálf og ætla að gera tilraunastarfsemi með það á næstunni í nýju Kitchen Aid vélinni minni :p
Undanfarnar vikur hef ég samt verið að skoða brúðarkjóla á netinu til að fá hugmyndir um hvernig kjól ég myndi vilja klæðast á stóra deginum. Er ekki hrifin af þessum týpísku kjólum sem eru voða í tísku hér á landi, þ.e. þessir hlýralausu með A sniði en samkvæmt spekingum eiga þeir hins vegar að klæða íturvaxnar konur með breiðar axlir og stór brjóst, flokkur sem ég klárlega fell undir. Er hinsvegar þó nokkuð viss um að fitubollan ég verði ekki neitt voða hipp og kúl í þannig kjól.

Eftir að hafa verið að vafra um á netinu í þó nokkurn tíma er ég búin að finna þrjá kjóla sem ég stoppa alltaf við. Allir rosalega flottir en mjög ólíkir. Er samt klárlega ekki að fara að setja inn mynd af þeim hér. Er hins vegar búin að detta inn á alveg brjálæðislega ljóta kjóla sem ég bara verð að pósta myndum af.

 Dúdda mía skoh!

 Hvað er að frétta með allt dúlleríið?

Ekkert snið og hvað er málið með slaufuna?

Hef aldrei skilið þetta mermaid snið, finnst þetta ekki fara neinni konu, sama hvernig hún er í vextinum!

Hlakka til þegar ég fer á stúfana að máta og gera þetta af alvöru en ekki bara pæla í þessu :)

Heimatilbúin pítubrauð

Við fjölskyldan höfum stundum pítu í matinn. Skiptumst á að hafa pítu með kjúkling eða túnfisk og eggjum, bæði hrikalega gott. Núna í gær höfðum við pítu með túnfisk og eggjum. Tek þá bara eina dós af túnfiski í vatni og sýð nokkur egg og set það grænmeti sem við eigum hverju sinni í og smá pítusósu eða sinnepssósu með. Mér finnst íslensk pítubrauð algjörlega óæt, þurr, hörð og bara engan vegin spennandi. Það varð því mikil gleði þegar mamma uppgötvaði Hatting pítubrauðin hérna í gamla daga en þau eru rosa góð.
Í gær ákvað ég hins vegar að baka pítubrauð í stað þess að nota þessi frá Herra Hatting ;) Þau eru aðeins grófari en Hatting brauðin og alveg rosalega góð.

Hér er uppskriftin:

Pítubrauð (nóg í 4 brauð)

3 dl hveiti
1 dl heilhveiti
0,5 dl sesamfræ
0,5 tsk salt
0,5 tsk sykur
1 1/4 tsk þurrger
1,5 dl volgt vatn

Öllu blandað saman og deigið látið lyfta sér í 20 mínútur. Deiginu skipt í fjóra jafnstórar kúlur og þær svo flattar út þar til þær eru svona 0,5 cm á þykkt. Raðað á bökunarplötu og látið lyfta sér aftur í 10 mínútur. Brauðin eru svo bökuð á blæstri í 5-10 mínútur á 180°C eða þar til þau eru orðin ljósbrún og mjúk og farin að blása örlítið út. Svo er bara að setja það sem manni langar í þá stundina í og njóta :)

Banana- og döðlubrauð

Að baka er með því skemmtilegasta sem ég geri. Hvort sem það eru kökur eða brauðmeti þá finnst mér fátt skemmtilegra en að skoða spennandi uppskriftir og prófa þær og jafnvel breyta eftir mínu höfði. Ekki verra líka ef maður getur breytt þeim og gert þær hollari :) Fékk rosalega gott banana- og döðlubrauð um daginn sem ég ákvað að testa hérna heima. Oft eru bananabrauð stútfull af sykri en ekki þetta. Bananarnir og döðlurnar sjá alveg um að sæta brauðið. Ein svona sneið slær algjörlega á alla sykurþörf og finnst mér það best beint úr ofninum með smá smjöri og osti. Mitt brauð varð aðeins of blautt í sér þannig ég held ég minnki ab mjólkina næst og lengi jafnvel bökunartímann enn meir en ég gerði. Við Jökull fengum okkur smakk og hann elskaði þetta. Restin var svo skorin í sneiðar og sett inn í frysti og því auðvelt að grípa í eina og eina sneið þegar manni langar í eitthvað smá sætt :)

Hérna er uppskriftin:

4 vel þroskaðir bananar, stappaðir
20 döðlur, saxaðar, ég klippi þær bara niður með skærum þar sem mér leiðist ógurlega að saxa döðlur
4 msk kókosflögur, ég notaði kókosmjöl því ég átti ekki flögurnar til
4 msk haframjöl
12 msk gróft spelti
4 tsk kókosolía eða önnur olía
2 tsk vínsteinslyftiduft eða matarsódi
1-2 msk ab mjólk, má líka nota vatn
Pínu salt

Öllu blandað saman í skál og sett í aflangt brauðform. Athugið að deigið er mjög blautt. Bakað við 180 gráður, án blásturs í 24 mínútur (ég nánast tvöfaldaði tímann - fer eflaust eftir ofnum hversu lengi best er að baka þetta) t.d muffinsform eða með matskeið á bökunarpappír, gott að búa til hring af bollum. Þetta eru svona 4-6 bollur. Má líka tvöfalda uppskriftina og búa til brauð, þá er best að baka þetta í 40 min. 180 gráður án blásturs í 24 mín.
Enjoy :)

Prjóni prjón

Var að enda við að klára húfu á Jökul. Varð rosalega skotin í húfu sem ein góð vinkona mín prjónaði fyrir einn prins og ég ákvað að herma. Notaði sömu litina og eru í flísgallanum hans því ég elska þá saman, súkkulaðibrúnan og túrkisbláan. Er samt ennþá að gera upp við mig hvort ég eigi að gera fyrir eyrun og band eða kannski bara band. Tek ákvörðun þegar ég er búin að máta húfuna á Jökul. Finnst svolítið gróft að fara að vekja sofandi veikan prins bara af því mig langar til að máta á hann húfu þannig óþolinmóða ég verð bara að bíða.

Hérna er afraksturinn :)

Hérna er svo uppskriftin: http://northernpurlygirl.blogspot.com/2011/11/garter-ribbing-my-baby-hat.html

Öppdeit:  Ákvað að gera fyrir eyrun og bönd á húfuna og kláraði hana í hádeginu í dag 19. febrúar. Hérna er svo prinsinn með húfuna, bara ágætlega sáttur með þetta :)

Kjúllasalat

Jói var ekki í mat í kvöld og þegar svo er nenni ég voða sjaldan að elda bara fyrir mig og Brynju. Jökull er ennþá bara í grænmetismauki og graut og svona smakki hingað og þangað þannig það er alltaf eitthvað til fyrir hann. Ég ákvað því í dag að taka kjúllabringu út úr frystinum og gera eitthvað skemmtilegt úr henni fyrir okkur Brynju í kvöldmat. Úr varð þetta fína kjúklingasalat og notaði ég bara það sem ég átti í ísskápnum og upp í skáp. Það sem ég elska við kjúklingasalat er hvað það er hægt að hafa það fjölbreytt. Hef aldrei gert nákvæmlega þessa samsetningu áður en hún var rosa góð.

Hér kemur það sem ég notaði:

Kjúklingurinn skorinn í bita, kryddaður með kjúklingakryddi og grillaður í George Forman grillinu
Iceberg rifið niður
Rauð paprika í bitum
Tómatar í bátum
Pink Lady epli skorið afhýtt og skorið í bita
Döðlur skornar í tvennt
Ristaðar ósalataðar kasjúhnetur
Smá fetaostur

Ég vil helst enga sósu á svona salat og það var skemmtilega öðruvísi að hafa bæði epli og döðlur og var það skemmtilegur contrast á móti sterka kjúklingakryddinu sem ég notaði á kjúklingabringuna :)

Upphafið af blaðrinu

Ég hef alltaf haft gífurlega þörf fyrir að tjá mig um allt milli himins og jarðar, mismerkilegt. Er eflaust búin að gera alla vini mína klikkaða á sífelldum status öppdeitum á Facebook sem skipta enga máli og fólk er eflaust búið að fá alveg nóg af endalausum barnamyndum og montstatusum um gullin mín tvö.

Ákvað því, meira fyrir sjálfa mig en nokkurn annan, að henda upp þessu litla bloggi þar sem ég get dúndrað niður blaðrinu mínu, fréttum af sjálfri mér, börnunum mínum, myndum og matar- og bökunaruppskriftum sem ég hef gaman af að prófa og breyta þannig ég fíla þær betur.

Ég sjálf hef rosalega gaman af því að skoða blogg hjá öðrum og þá sérstaklega þar sem fólk er að deila myndum af sínu daglega lífi, upplýsingum um hönnun, uppskriftum og persónulegum sögum og verður þetta kannski eitthvað í þeim anda en samt bara á mínum forsendum :)